Desember 2013

Ekki hefur hann nú verið mánuður stórræða þessi desembermánuður. Ég hef hjólað eina 7 daga til og frá vinnu. Ýmist sleppt því vegna veðurs eða einhverra snúninga. Þetta gerir um 3.100 km á árinu. Ég hélt að markmiðið hefði verið 3.500 km en það var víst ekki nema 3.000 þannig að því markmiði er náð. Held hins vegar að setja ætti markið hærra á næsta ári. Sjáum aðeins til með það.

Nóvember

Nóvember var þokkalegur hvað ástundun varðar. Hjólað 15 daga af 21. Það gerir þá um 300 km þennan mánuðinn. Þá er maður kominn í 2960 km á árinu. En veðrið hefur verið frekar leiðinlegt, talsverður vindur og miklar umhleypingar. Óvenju algengar vestanstæðar áttir.

31. október

Ekki var nú október mánuður stórra afreka á hjólasviðinu. Aðeins 11 virkir dagar hjólað eða 220 km. Þá er ég kominn í 2.660 km það sem af er ári. Það þýðir að maður slefar kannski yfir 3.000 km á árinu.

29. október - nagladagur

Svona til að minna mig á þá setti ég eitt nagladekk undir í gærkvöldi, að framan. Í morgun var engin hálka en frost.Það vill svo skemmtilega til að í fyrra setti ég nagladekkin undir 28. október.

Hjólað í september

Markmiðin náðust ekki í september. Hjólað 14 daga til og frá vinnu, alls 280 km. Þarna spiluðu inní frí o.fl.
Engin hálka hefur enn komið í Reykjavík á mínum ferðum en nærri því oftar en einu sinni. Október getur verið ansi tvísýnn oft en ég stefni yfirleitt að því að fara ekki á nagla fyrr en í nóvember.

31. ágúst

Hjólaði 18 daga til og frá vinnu í mánuðinum. Það er alveg þokkaleg ástundun. Í kílómetrum er þetta um 360 km í mánuðinum. Þá eru þetta orðnir um 2160 km á árinu þegar fjórir mánuðir eru eftir.

13. ágúst

Kom til vinnu fyrir viku síðan. Hjólaði akkúrat 0 km til og frá vinnu í júlí.
Ég er mikið að spá í að fá mér annað hjól en tími því ekki. Það endaði eiginlega með því að ég þreif hjólið mitt nokkuð vel og smurði og þá leit það miklu betur út.
Það var ánægjulegt að sjá nýja hjólastanda við ráðuneytið. Öflugir bogar sem hægt er að læsa stellið við. Gott mál. Það væri fínt að fá skýli yfir þetta en ekki grundvallaratriði.

Hjólað í maí og júní

Samkvæmt dagatalinu mínu hjólaði ég 19 daga í maí, sem gera um það bil 380 km. Í júní eru þetta 11 dagar og því um 220 km. Þannig hef ég hjólað 600 km samtals í þessum tveimur mánuðum. Þá eru þetta orðnir tæplega 1.800 km til og frá vinnu á árinu þegar það er hálfnað. Nú tekur við dauður mánuður en markmiðið má vel setja á 3.500 km.

Hjólað í apríl

Samkvæmt lauslegri úttekt á ástundun í apríl þá hef ég hjólað 19 daga af 20 vinnudögum. Það eru um 380 km sem er bara ágætt held ég. Þetta gerir alls 1175 km á þessu ári. En eins skrítið og það er þá fer hjóluðum dögum í hverjum mánuði að fækka héðan í frá. Það gera allskonar frí.

11. apríl

Ég prófaði til gamans aðra leið, hjólaði Fossvoginn, út í Nauthólsvík, Hlíðarenda og svo í gegnum Þingholtin. Að mestu leyti fín leið en um 1,5 km lengri en sú sem ég hef farið, og meiri hæðabreytingar.

3. apríl

Nú er hjólaleiðin Blásalir - Skuggasund orðin nokkuð mótuð. Ég fylgi áður þekktri leið gegnum Seljahverfi og Mjódd, niður í Elliðaárdal og undir Reykjanesbraut við Sprengisand. Svo liggur leiðin meðfram Suðurlandsbraut að norðanverðu og síðan Laugavegi. Þá taka málin að flækjast örlítið en þegar kemur niður í 101 þá eykst tíðni umferðarljósa og einstefnugatna verulega. Þá reynir á hvort löghlýðni eða skilvirkni vegur þyngra. Ég hjóla síðan Hverfisgötuna alveg vestur á Klapparstíg. Það verður að segjast eins og er að Hverfisgata er orðin heldur þreytt. En mér sýnist þetta vera fljótlegasta leiðin. Er ekki búinn að mæla þetta með óyggjandi hætti en geri ráð fyrir að þetta séu um 10 km. Ferðatíminn er sennilega um 25-30 mín.

Umhverfis- og auðlindaráðuneytið er ekki langt komið í þjónustu við hjólandi starfsmenn. Hér er afar döpur aðstaða til að geyma hjólin úti, eingöngu gjarðabanar og því best að festa hjólið við næsta ljósastaur, sem eru reyndar ekki margir. En hér er alveg þokkaleg sturtuaðstaða. Mættu vera skápar til að geyma í föt og slíkt. Mér skilst að hér sé styrkur í boði fyrir þá sem hjóla vegna rekstrarkostnaðar en að hann sé ekki greiddur út fyrr en eftir ár. Þess má geta að ráðuneytið kaupir strætókort fyrir starfsmenn sem nýta þann samgöngumáta strax en ekki eftirá. Gott að halda þessu til haga.

27. mars

Þessi marsmánuður er ekki hinn mikli hjólamánuður. Óhagstæður í nokkra daga vegna snjóalaga og óveðurs, sem gerist nú sjaldan hér. Svo ráðstefnur úti á landi. Þannig að í heildina voru þetta ekki nema einhverjir 9 dagar í mánuðinum. Það er nú afar slappt. Þetta gerir sennilega u.þ.b. 180 km, sem er óásættanlegt ætli maður sér að ná 3000 km á árinu til og frá vinnu.
En allar aðstæður eru orðnar hagstæðar, fyrir utan svona smávegis vegavinnu með Laugavegi, sem er satt að segja orðin nokkuð langdregið dæmi.

25. mars

Nagladekkin fóru undan í gær, alltaf sama frelsunin að losna við þau. Bæði minnkar hljóð og viðnám. Hraðinn verður því heldur meiri sem og almenn ánægja.

4. mars

Ég hjólaði 18 daga til og frá vinnu í febrúar. Það gerir um 325 km. Nú er ég hins vegar búinn að skipta um vinnu og hjóla heldur lengra, alveg niður í Skuggasund. Hef ekki enn skilgreint bestu leiðina en sennilega er það Skúlagatan. Allavega bætast væntanlega við um 2 km á dag.

4. febrúar

Það kom aftur vetur um helgina og talsverður snjór kominn í morgun. Enn og aftur vonbrigði með þjónustuna í Kópavogi. Verð að segja að það er slappt að vera ekki búinn með marga fjölfarna stíga fyrir kl. 8.
Reykjavík er með betra verklag. Flestar lykilleiðir mokaðar. Gæðin mætti hins vegar bæta.

31. janúar

Nú er janúar á enda runninn, óhemju hratt að mínu mati. Ég hjólaði til og frá vinnu 16 daga í mánuðinum, fjórir vinnudagar fóru í veikindi hjá börnunum og einn daginn kom ég á bíl! Árið byrjar þokkalega að þessu leyti og ég þá væntanlega búinn að hjóla um 290 km á árinu.
Færðin hefur verið alveg þokkalega það sem af er ári. Oft reyndar hált og vindur en að mestu laust við snjó.

3. janúar 2013

Staða hraðamælis um áramót er 8430 km. Síðustu áramót var mælirinn í 5750 km. Það þýðir að ég hef hjólað um 2700 km á síðasta ári. Það er ekki alveg 3000 km markmiðið sem ég setti en svona allt í allt eru þetta um 300 ferðir eða um 150 dagar. Það er kannski viðunandi ástundun?