24. ágúst 2012

Svona til gamans þá prófaði ég að taka betur á með klitspedulunum á leiðinni í vinnuna og það er ljóst að þeir gefa mikla möguleika. Með því að toga pedalana líka upp heldur maður miklu betur ferð, sérstaklega uppímóti. Samkvæmt hraðamælinum mínum hélt ég 27,8 km/klst hraða á leiðinni hérna niðureftir og þá munar miklu að geta haldið hraða upp brekkur á leiðinni. Ég þarf síðan að prófa þetta betur á heimleiðinni.

Ég verð bara að blogga um frétt á heimasíðu Kópavogsbæjar frá 20.8. sl. um að gera eigi endurbætur á hjólastíg frá Borgarholtsbraut niður í Kópavogsdalinn. Þarna er ein mest hjólaða leiðin á höfuðborgarsvæðinu, lykilleið fyrir þá sem hjóla milli Reykjavíkur og Garðarbæjar eða Hafnarfjarðar. En þessi leið er afar óhentug sem hjólaleið vegna mikillar hækkunar, sennilega um 40 m hækkun. Bílar aka um Gjánna, sem liggur talsvert lægra. Af hverju er ekki gerð hjólaleið í gegnum Gjánna?

1. júlí 2012

Á öðrum fjórðungi ársins hjólaði ég 626 km og ODOmeterinn stendur í 7000 km

12. apríl

Nagladekkin fuku undan í gær og gömlu sumardekkin undir. Mikill léttir en sennilega endast gömlu dekkin ekki mjög lengi.

Apríl 2012

Fyrsta fjórðung ársins hef ég hjólað 620 km til og frá vinnu. Þetta færist til bókar.

29. nóvember

Nú er snjór og hálka á öllum stígum. Yfirleitt hefur tekist nokkuð vel að moka og stígarnir ekki mjög ósléttir. Frostið á það til að bíta í andlitið. Þetta er í sjálfu sér bara hressandi þegar maður er ekki nema um 30 mín á ferðinni í einu. Aðalatriðið er að klæðast vindheldu, þannig dregur maður augljóslega úr vindkælingu. Lambhúshetta og buff fyrir nefinu er ágætis skjól fyrir andlit og höfuð.

23. nóvember

Merkilegur morgun í morgun. Ég setti nagladekkin undir í fyrradag. Ekki var hálkunni fyrir að fara í morgun, smá slabb hér og þar en rokið var talsvert. Suðvestan sperringur sem náði sér hvað best upp í Borgartúninu í formi hviða á milli húsa. Svo var mikil rigning með. En ansi var þetta hressandi.

19. október

Bara svo það sé skrásett þá var fyrsta hálka haustsins í morgun. Ég ákvað að hjóla ekki.