Hjóladagbók 2009/2011

29. nóvember

2011-11-29T13:53:00.000Z

Nú er snjór og hálka á öllum stígum. Yfirleitt hefur tekist nokkuð vel að moka og stígarnir ekki mjög ósléttir. Frostið á það til að bíta í andlitið. Þetta er í sjálfu sér bara hressandi þegar maður er ekki nema um 30 mín á ferðinni í einu. Aðalatriðið er að klæðast vindheldu, þannig dregur maður augljóslega úr vindkælingu. Lambhúshetta og buff fyrir nefinu er ágætis skjól fyrir andlit og höfuð.

23. nóvember

2011-11-23T11:48:00.000Z

Merkilegur morgun í morgun. Ég setti nagladekkin undir í fyrradag. Ekki var hálkunni fyrir að fara í morgun, smá slabb hér og þar en rokið var talsvert. Suðvestan sperringur sem náði sér hvað best upp í Borgartúninu í formi hviða á milli húsa. Svo var mikil rigning með. En ansi var þetta hressandi.

19. október

2011-10-20T08:53:00.001Z

Bara svo það sé skrásett þá var fyrsta hálka haustsins í morgun. Ég ákvað að hjóla ekki.

19. september

2011-09-19T10:52:00.000Z

Nú er búið að malbika við Sprengisand, þennan fína stíg með ljósastaurum. Þarna fór saman eini malarkaflinn a.m.k. á minni leið og auk þess óupplýstur. En úr þessu er sumsé verið að bæta.

8. september

2011-09-08T09:22:00.000Z

Haustkuldinn, versti óvinur hjólreiðamannsins, er kominn. Fjórar gráður í morgun og Norðan 8. Það fer ekki vel saman.
Nú stendur fyrir dyrum mikil hjólaráðstefna í tilefni af samgönguviku á vegum LHM og Hjólafærni á Íslandi. Hjólað til framtíðar. Gott framtak. Flott að fá erlenda fyrirlesara í hina íslensku umræðu. Ég get svosem gagnrýnt hvað dagskráin er þétt og mörg erindi en það þarf að koma miklu að. Auk þess er hún allan daginn, sem dregur úr líkum á að fólk sjái sér fært að mæta. Alltaf jákvæður.
En það er gaman að finna hversu margir láta allt tal um slæmar aðstæður til hjólaiðkunar eins og vind um eyru þjóta og hjóla bara eins og ekkert sé sjálfsagðara.

11. ágúst 2011

2011-08-11T09:07:00.000Z

Það hefur orðið gríðarleg fjölgun hjólreiðamanna síðasta árið. Þetta má væntanlega að miklu leyti rekja til hækkana á eldsneyti. Þessi fjölgun þrýstir væntanlega eitthvað á samgönguyfirvöld, bæjarfélög og ríki, að bæta aðstöðu hjólreiðafólks. Bætt aðstaða snýst í meginatriðum um tvennt, að auka öryggi og greiðfærni á hjólaleiðum. Öryggi snýr þá að öllum vegfarendum, ekki síst gangandi fólki sem er í talsverðri hættu vegna hjólandi fólks, en einnig að hjólandi fólki gagnvart bílum. Greiðfærni snýst ekki síst um forgang hjólandi umferðar gagnvart bílaumferð, vali á leiðum (stofnleiðir og tengileiðir), hönnun hjólavega og þjónustu á þeim. Nú er best að tala bara um hjólavegi en ekki hjólastíga.
Einnig þarf að taka afstöðu til nýrra farartækja í umferðinni s.s. rafmangsvespa og rafmagnsreiðhjóla sem í einhverjum bjóða upp á meiri hraða en hefðbundin reiðhjól.
Nú styttist í haustið og þá dregur aftur úr umferð hjólandi en á næsta ári dregur vonandi til tíðinda því lítið hefur gerst í ár annað en að þrýstingur á kerfið eykst.

30. júní

2011-06-30T08:34:00.000Z

Bloggið er nú eiginlega búið að vera hjá mér. Ég er hins vegar búinn að vera nokkuð duglegur að hjóla í júní þetta vorið, enda kominn í fulla vinnu, búinn með allt fæðingarorlof. Það er búið að vera ótrúlega kalt loft í mánuðinum, þrátt fyrir fallegt veður og sól. En hjólaumferðin er líka búin að vera talsverð og umferðarreglur skipta sífellt meira máli á stígunum. Það er afar mismunandi hvað fólk tekur umferðarreglur alvarlega við þessar aðstæður. Staðsetning á stígnum, hægri regla, hjólandi vs. gangandi, o.s.frv. Stundum verður hálfgert kaos. Annars er þetta besti ferðamátinn 9-10 mánuði á ári.

27. maí

2011-05-27T08:36:00.000Z

Það er aftur komið vor. Hjólaferðin í morgun var bara mjög ánægjuleg m.t.t. veðurs og vorilmur í lofti. Ég hef velt því fyrir mér hversu miklu mjög góðar hjólareinar breyta varðandi ferðatíma og öryggi hjá þeim sem stunda samgönguhjólreiðar. Ég veit það sjálfur að ég er mun fljótari í ferðum ef ég hjóla á götum, nema ef ég hitti afar illa á umferðarljós. Sem dæmi tekið þá hef ég verið allt að 35 mínútur á leiðinni heim úr vinnu í slæmri færð og allt niður í rúma 21 mínútu. Þarna munar 14 mínútum eða yfir 60% í ferðatíma. Þetta hins vegar þýðir að þegar best gerist þá er ferðahraði mjög mikill og hentar alls ekki á stígum með blandaðri umferð m.t.t. öryggis. Ef meðal ferðahraði á hjóli er 25-30 km/klst þá er maður kannski ekki í takt við hægari umferð.

9. maí

2011-05-09T15:34:00.002Z

Verð að benda á þessa tilraun Reykjavíkurborgar þar sem hægt er að færa inn hjólaleiðir og s.k. vápunkta:

http://lukr-01.reykjavik.is/hjolakonnun/#

2. maí

2011-05-02T09:05:00.000Z

Það var slabb á fáfarnari stígum í morgun. Annars var færið bara þokkalegt. Ég sá ekki hjólreiðamann fyrr en á brúnni yfir Miklubraut, hélt að hjólaumferðin væri orðin meiri en þetta.
Ég ræddi við frænda minn í gær um rafmagnsreiðhjólin sem eru að koma sterk inn. Þessi tæki fara þokkalega greitt yfir og það á frekar slökum göngu-/hjólastígum. Ég er ekki sannfærður um að þetta sé heppilegt og kannski kristallar enn frekar þörfina á sérstökum hjólareinum. Slysin á þessum leiðum eru afar illa kortlögð og enginn hefur yfirsýn yfir fjölda hjólreiðaslysa á hjólastígunum. Þetta er afleitt. En Rannsóknanefnd umferðarslysa fékk víst styrk frá Vegagerðinni til að vinna slíka úttekt. Vonandi að það gangi eftir og skili sér síðan inn í hjólreiðaáætlun höfuðborgarsvæðisins.

18. apríl

2011-04-18T08:24:00.002Z

Þetta er búið að vera stopult hjólaár. Nú upp á síðkastið hef ég reyndar mætt í vinnu 2-3 daga í viku. Ég er búinn að fá minn skammt af sprungnum dekkjum eftir að ég skipti yfir á sumardekkin. Sprakk tvo daga í röð á leið til vinnu, sem er vægast sagt pirrandi. Og þrátt fyrir almennt umburðarlyndi mitt gagnvart veðri þá hefur það verið frekar leiðinlegt undanfarnar vikur. En ég held að alvöru vorið sé á næsta leiti.

30. mars

2011-03-30T13:55:00.000Z

Mars á þessu ári er sennilega slakast hjólamánuðurinn minn síðustu tvö árin. En nú er vor í lofti og kannski kominn tími á að fjarlægja nagladekk.

16. mars

2011-03-16T08:27:00.000Z

Hjólaði loksins til vinnu eftir langt hlé. Snjór og frekar slakt færi. Best mokað frá Álfabakka að Miklubraut. Annarsstaðar lélegt.

14. febrúar

2011-02-14T08:48:00.000Z

Það var slabb á stígum og fáfarnari götum og frekar erfitt að hjóla í þessu færi. Þess vegna voru fjölfarnari götur freistandi valkostur, alauðar en blautar. En þetta gekk allt slysalaust fyrir sig.
Ég skipti um bremsupúða að aftan í gær, það er u.þ.b. akkúrat 3 sett á einu ári. Þeir endast sumsé ca 1000 km.

4. og 7. febrúar

2011-02-07T09:14:00.000Z

Heimferðin á föstudag var sú versta hingað til á hjóli. stígarnir höfðu ekki verið mokaðir síðan um morguninn og eftir það kyngt niður snjó. Ég teymdi hjólið talsverðan spöl en endaði á því að taka strætó í Mjódd.
Mánudagsmorguninn var ekki mikið betri, illa og óreglulega mokað um kl. 8. Ekki er alltaf ljóst hvað ræður vali á leiðum sem eru mokaðar. Þarna reynir á fagmennsku og skipulag í snjómokstri. Þetta eru ekki margir dagar á ári en gaman ef það gæti gengið nokkuð greiðlega að moka á þeim dögum. Það voru bara nokkrir á hjóli í morgun, ótrúlegt en satt.

4. febrúar

2011-02-04T09:35:00.001Z

Snjórinn er skemmtilegt viðfangsefni þegar kemur að hjólreiðum. Reiðhjól henta frekar illa sem farartæki í snjó en auðvelt er að þeytast í gegnum nýfallna mjöll ef undirlagið er þokkalegt. Snjómokstur er því eiginlega forsenda fyrir því að hægt sé að komast á milli staða ef snjór er viðvarandi á leiðinni. Þetta má kalla staðreynd og ef litið er til nágrannaríkjanna t.d. í Skandinavíu þá er snjómokstur á hjólastígum forgangsverkefni. Hér á landi er það yfirleitt afgangsstærð. Snjó er jafnvel mokað yfir stígana. Í snjó er mjög hættulegt að hjóla á götum. Bæði er hætta á að maður detti og einnig er erfiðara að stöðva bíla ef t.d. hjólreiðamaður dettur fyrir framan bílinn. Öryggisins vegna er því mjög mikilvægt að farið sé snemma morguns af stað og mokaðir a.m.k. helstu stígar. Það eru ekki sömu tæki í stígamokstri og göturmokstri og því erfitt að sjá að þetta geti ekki gerst á svipuðum tíma.

3. febrúar

2011-02-03T09:27:00.000Z

Snjór og fínt veður. Færðin kannski ekki upp á það besta. Sumsstaðar alls ekki búið að moka og annarsstaðar skafið vel og vandlega. Þegar færðin er svona þori ég ekki að hjóla á götunni og fer því upp á gangstétt. Þær eru hins vegar þess eðlis að mjög erfitt er að moka þær vel, mishæðir og kantar. Betra væri að hafa brautir sem liggur vel við að skafa.

18. janúar

2011-01-19T08:37:00.002Z

Mikill mótvindur á heimleiðinni í gær og líka snjór. En það var yfirleitt þokkalega hreinsað af stígunum. En heimferðin var drjúgerfið.

17. janúar

2011-01-17T08:59:00.000Z

Ótrúleg hálka í morgun. snjór yfir ísingarlagi og naglarnir náðu varla í hálkuna. Hjólið skrikaði nokkrum sinnum í beygjum. Datt einu sinni. En Reykjavík var komin af stað að moka vel fyrir kl 8 og eiga hrós skilið fyrir að. Þetta þarf náttúrulega að gerast kl. 7 svo það gagnist sem flestum. En með því að fara snemma af stað þá treðst snjórinn síður og hreinsast betur af stígunum.

13. janúar

2011-01-14T12:47:00.000Z

Heimleiðin í gær var í 11 m/s mótvindi. Þetta telst fremur mikill vindur og hvín nokkuð í eyrum. Þegar hjólað er í svona miklum vindi er kostur ef til staðar eru hjólaleiðir með trjágróðri í næsta nágrenni eða inní þéttri byggð. Verst er að vera á berangri eða milli hárra bygginga sem vindur á greiða leið á milli í formi vindhviða. Mótvindur hefur ekki hvað síst sálræn áhrif því maður mjakast ótrúlega áfram þrátt fyrir vindinn. Hann er hins vegar afar hvimleiður í eyrum og getur þannig haft lamandi áhrif.
En ég mæli með að trjágróður sé frekar regla en undantekning með hjólastígum hér á höfuðborgarsvæðinu, a.m.k. þar sem komið er út fyrir þéttustu byggðina.

12. janúar

2011-01-12T08:37:00.000Z

Talandi um mengun. Það hefur verið talsvert svifryk á minni hjólaleið síðustu daga, einkum þar sem ég er nálægt Miklubraut og Reykjanesbraut en líka þegar kemur inn í Seljahverfið. Þetta er megnasti óþverri. Samkvæmt upplýsingavef Umhverfis- og samgöngusviðs Reykjavíkur þá er svifryk (PM10) agnir sem eru minni en 10 míkrómetrar (µm) að stærð. Svifryk sem er 10 µm að stærð eru aðeins 1/6 af þvermáli hárs. Hérlendis hefur verið framkvæmd ein rannsókn á uppruna svifryks að vetrarlagi og kom þar eftirfarandi samsetning í ljós: malbik (55%), bremsuborðar (2%), sót (7%), salt (11%) og jarðvegur (25%). Þ.e. yfir 60 % allra mengunar að vetri til verður til vegna samgöngutækja og þar spila nagladekkin stórt hlutverk þar sem þau rífa upp malbikið.

Maður finnur þetta setjast inn í öndunarfærin og það er ekki gott að vita til þess að malbik og bremsuborðar sitji þar.En það gæti verið skynsamlegt að setja grímu fyrir vitin þegar ástandið er verst.

6. janúar

2011-01-07T08:41:00.000Z

Þrettándi dagur jóla þetta árið er sennilega kaldasti dagur sem ég hef lifað hér á höfuðborgarsvæðinu. 10 stiga frost og norðan 10-18 m/s. Ég hjólaði heim og það var ekkert mál undan vindi en ef ég sneri lítillega á móti vindi þá beit frostið gríðarlega í andlitið. Ég mætti ekki nema einum hjólreiðamanni og hann var með hulið andlit og skíðagleraugu, sem betur fer fyrir hann. Hef sett það hér fram áður að kaldur mótvindur er versti óvinur hjólreiðamannsins.

5. janúar

2011-01-05T09:03:00.001Z

Smá uppgjör fyrir árið 2010
Alls hjólaðir km á árinu: 3.230 km
Hjólaðir dagar: 174
Að meðaltali 18,5 km/dag
Meðal ferðatími heim: 27:12 mín
Meðal ferðatími til vinnu: 23 mín
Rigning: 29 dagar eða 17%
Hálka: 20 dagar eða 11%
Mesti vindur: 12 m/s, fyrir utan hviður
Algengustu vindáttir: SA 22% og A 22%. NA 18%.

3. janúar 2011

2011-01-03T09:46:00.000Z

Gleðilegt ár!
Veit ekki hvort ég blogga eitthvað á þessu ári um hjólaferðir, kannski bara þegar mig langar. En árið byrjar vel með mildu veðri, sem á reyndar að enda í kvöld með frostakafla út vikuna. Kannski fer ég í að blogga svona almennt um hjólreiðar nú eða samgöngur. T.d. hvort aðgengi að hjólastígum og almenningssamgöngum muni hafa áhrif á fasteignaverð á næstunni í ljósi fábreytni í fjárfestingakostum Íslendinga. Það er að mínu mati t.d. frekar undarlegt að nú sé skorin niður ákveðin grunnþjónusta í almenningssamgöngum, þegar fæstir hafa orðið ráð á að reka bíl, hvað þá tvo. T.d. koma lok á kvöldakstri vagna sér mjög illa fyrir ungt fólk sem er í alls kyns tómstundastarfi.

22. desember

2010-12-22T15:08:00.000Z

Nú stefnir í það að ég hjóli ekki mikið meira á þessu ári, nema heim úr vinnu í dag. Hugsanlega í fyrramálið. En þá verður líka komið að uppgjöri ársins eftir áramót. Spennandi!?

21. desember

2010-12-21T08:27:00.000Z

Ja hérna, það eru bara alveg að koma jól.Stysti dagur ársins í dag og tunglmyrkvi í morgun. Ekki lítið huggulegt. Ég hafði tunglið á vinstri hönd og svo beint framundan svo ég naut þess að horfa á þessa rauðbleiku jólakúlu alla leiðina. Það var líka frost en kom á óvart hvað það beit lítið í andlitið. Sennilega lágt rakastig.
En mér var lítið kalt, aðallega á tánum. Fór í ullarbolinn í morgun og setti eyrnaband yfir eyrun, utanyfir lambhúshettuna. Það virkaði snilldar vel.

20. desember

2010-12-20T08:57:00.000Z

Ég gerði smá hlé í síðustu viku vegna óreglu í vinnu og félagslífi.
Veit ekki hversu góð ástundun verður í þessari viku, Þorláksmessa og reyndar spáir miklum kulda á morgun. Spurning hvort maður tekur það eða ekki.
Mér finnst rannsóknin mín hafa leitt í ljós að kuldi er í raun meira hamlandi á hjólreiðar en vindur þ.e.a.s. hæfilega hlýr vindur.

15. desember

2010-12-15T08:39:00.000Z

Þessi hlýindi eru ósköp næs á árstíma sem býður oft upp á frost og kulda. En þetta er ekki beint jólalegt eða þannig. Stefnir ótrautt í rauð jól. En fyrir hjólamenn þá er betra að hafa hlýindin.Jólin eru hið innra.

14. desember

2010-12-14T08:47:00.000Z

Það er kominn 14. desember og aðeins um tvær vikur þangað til árinu verður lokað á hjólablogginu. Miðað við undanfarna daga þá verður væntanlega ekki eins mikið um blogg árið 2011 enda verður þá ekki lengur markmiðið að blogga daglega.

13. desember

2010-12-13T08:36:00.000Z

Vegna misgóðrar lýsingar á stígunum þá á maður oft á hættu að sjá ekki yfirborðið. Oftar en einu sinni hef ég lent í því að hjóla á harðan köggul eða stein á stígnum, sem ég sé ekki vegna myrkurs. Ljósin á hjólinu eru að öllu jöfnu nánast gangslaus í þessu samhengi þar sem þeirra hlutverk er fyrst og fremst að gera mann sýnilegan en ekki til að bæta vegsýn. Það er nefnilega ansi dimmt víða á stígum þessa dagana.

10. desember

2010-12-10T08:41:00.000Z

Þessi hláka með sínu myrkri, bleytu og vindi er svosem allt í lagi. Það er hlýtt og notalegt.

9. desember

2010-12-09T08:31:00.000Z

Hlákan tók öll völd í nótt og hálka og ís voru horfin í morgun. Það verður að segjast eins og er að það er ansi mikið léttara að hjóla ef maður þarf ekki að klæða sig fyrir frost. Sennilega er það ekki síður áhrifavaldur en vindurinn.

8. desember

2010-12-08T08:56:00.000Z

Það var kominn tími á að dæla í dekkin og ég fór á sjálfvirku dæluna á Olís við Suðurlandsbraut. Ég er með franskan ventil og því þarf ég millistykki til að dæla með bílpumpu. Yfirleitt þarf að nota stillingu eins og um sprungið dekk sé að ræða til að dælan taki við sér en stilla jafnframt á þrýstinginn sem maður vill hafa í dekkinu. Þá á þetta að ganga stóráfallalaust fyrir sig. En maður hefur óneitanlega á tilfinningunni að þetta geti sprengt slönguna bara sisona. Þetta gerir maður ef ekki er til almennileg pumpa með þrýstingsmæli á heimilinu.

7. desember

2010-12-07T09:24:00.000Z

Mun hlýrra í dag en ansi var kalt á leiðinni heim í gær.

Svona þegar maður hugsar um það þá annað hvort hætti ég að blogga á næsta ári eða þá að ég verð fræðilegri þá, skoða gögn varðandi hjólreiðar og læt gamminn geisa um þau. Spái í það. Stundum hefur maður mjög lítið að segja og hver dagur verður öðrum líkur. Hins vegar stefni ég á skýrslu þar sem árið 2010 verður gert upp í heild sinni.

6. desember

2010-12-06T08:31:00.002Z

Helv kalt í morgun, um 7 stiga frost. Það er kaldasti dagurinn í haust held ég.

2. desember

2010-12-02T08:57:00.001Z

Aftur komið frost og hálka. En þetta vindleysi er hreint snilld.

1. desember

2010-12-01T08:49:00.000Z

Fullveldisdagurinn í allri sinni dýrð. Rigning og myrkur að morgni.
Til gamans birti ég hér að neðan vindgögn hingað til á árinu. Nóvember raðar sér í flokk með júlí þar sem meðalvindhraði er 3,3 m/s en í nóvember var nánast sami vindhraði til og frá vinnu en það er óvenjulegt. Ríkjandi vindátt var norðaustanátt. Meðalhraði var með því lægsta sem ég hef mælt á árinu, bæði til og frá vinnu eða svipað og í febrúar. Meðalhraði til vinnu var 22 km/klst en 19 km/klst heim. Þessi litli munur skýrist væntanlega af ríkjandi norðaustanátt.

30. nóvember

2010-11-30T08:34:00.000Z

Ansi launhált í gærkvöldi og í morgun. Í myrkri og bleytu sáust ekki skilin milli hálku og malbiks og stundum var eina vísbendingin um hvort væri, hljóð eða hljóðleysi í nöglunum. Þeir þagna um leið og komið er á hálku en gefa frá sér hátt surghljóð á malbikinu.

29. nóvember

2010-11-29T08:47:00.001Z

Jæja, kominn í 3000 km á árinu til og frá vinnu. Held það sé bara ágætt. Keyrandi sömu vegalengd myndi kosta mig rúmar 60 þús kr altso á þessum bíl sem ég á. Svo spara ég mér kostnað við líkamsrækt, sem heyrist mér vera talsverður. Alls hef ég hjólað 161 dag á árinu so far og að meðaltali var ég 23 mín í vinnu og 27 mín heim.

26. nóvember

2010-11-26T08:27:00.000Z

Miðað við að ég klári nóvember með sóma þá verður þetta sennilega besti ástundunarmánuðurinn á árinu. Það eru þegar komnir 19 hjóladagar í nóvember og janúar. Og á mánudag, að því gefnu að ég hjóli þá, þá næ ég 3000 km á mælinn til og frá vinnu þetta árið. Það verður að segjast eins og er að það hvetur mann áfram að halda svona dagbók um þetta hjólastand. En það verður líka að hafa í huga að þetta er náttúrulega hámarks nörd hegðun.

25. nóvember

2010-11-25T10:55:00.000Z

Það datt út hálfur dagur hjá mér en nóvember er annars búinn að vera góður. Veðrið er bara frábært, lítill vindur og svalt.

23. nóvember

2010-11-23T09:10:00.000Z

Logn er sjaldgæft á Íslandi, hvað þá í Reykjavík. Það var hins vegar logn í morgun og indælt veður í flesta staði. Dálítil hálka og tunglið glampaði í ísnum. Fjölbreytt umferð á leiðinni og það er reynslan að flestir haga sér eins og það séu ekki aðrir á ferð um stígana. Hvort sem fólk er hjólandi eða gangandi þá sikk sakkar það þvers og kruss um stíginn. Ætli maður að taka frammúr þarf verulega að gæta að sér og oft að fara út fyrir stíginn.
Framkvæmdir við stíg sem tengir Miklubrautarbrúna við Suðurlandsbraut eru enn í gangi og lítið gert til að greiða leið vegfarenda. Þvert á móti var stór malarhrúga á miðjum stíg, sem sést illa í myrkrinu. Vafalítið hefur einhver hjólað inn í hrúguna í morgun. Þarna eru engar ráðstafanir gerðar til að leiða fólk framhjá framkvæmdunum. Í gær var verið að hefla og aðeins fær leið utan stígsins, í beði eða út í gras. Mér finnst þetta frekar slappt.

22. nóvember

2010-11-22T08:46:00.000Z

Ansi dimmt í morgun og allt hrímað en yndislegt veður. Ég hélt ég yrði keyrður niður í Skógarselinu en slapp. Þar eru vond gatnamót sem eru hættuleg á morgnana í þessum skilyrðum. Sýnileiki hjólreiðamanns í umferðinni er eitthvað sem ekki á að treysta á. Í myrkrinu nær maður ekki augnkontakt við bílstjóra og veit því ekki hvort hann hefur séð mann eða ekki. Það getur því komið fyrir að hann er stopp en leggur svo af stað á versta tíma. Þetta er eitthvað sem við hjólreiðamenn þurfum einfaldlega að vita og kunna að meta. Það er varla hægt að verða meira sýnilegur en ég er, með gott ljós og í áberandi endurskinsvesti. Götulýsingin er ekki verri þarna en gengur og gerist. Ég er hins vegar þeirrar skoðunar að gagnstéttarnar á þessu svæði séu fullt eins hættulegar þar sem þær þvera mjög oft götur.

19. nóvember

2010-11-19T09:26:00.000Z

Snilldar veður núna. Hlýtt og notalegt. Óþægindin á leiðinni voru einkum myrkur og fáránlegar framkvæmdir við brúnna yfir Miklubraut. Þar er búið að taka malbikið af stígnum og stígurinn skilinn eftir með hæðum og hólum, illa upplýstur. Eitt viðvörunarmerki staðsett þar sem maður dettur niður af malbikinu í mölina. Ekki vel að þessu staðið.

18. nóvember

2010-11-18T10:05:00.000Z

Ef ég skoða hraðagögnin hjá mér þá er nóvember hingað til hægasti mánuðurinn minn síðan um síðustu áramót. Þetta kemur á óvart þar sem vindur hefur ekki verið mikið til trafala og færið alveg þokkalegt. Formið sem ég er í sjálfur ætti að vera í nokkuð góðu standi. Þá er spurning hvað veldur þessu. Dagsformið er eitt en það gildir yfirleitt bara í einn dag. Kannski hef ég verið meira klæddur. Reyndar hefur norðanátt verið ríkjandi í mánuðinum. Það veldur því að ég er í mótvindi helming leiðarinnar í vinnuna og helming leiðarinnar heim. Síðasta vetur voru austlægar og suðaustlægar áttir ríkjandi og þær eru erfiðastar á heimleiðinni en ekki eins kaldar enda var ekki oft frost þá. Ég hef komist að því að köld og sterk norðanátt er versta áttin. Þegar hún er á móti þá dregur hún úr manni mátt með kuldanum auk vindáhrifa. Einn hægasti og erfiðasti dagurinn minn hingað til var 15. febrúar en þá var norðvestan 9 m/s og 2,6 stiga frost. Hægari dagar voru bara ef færð var mjög slæm vegna snjóa.

17. nóvember

2010-11-17T08:28:00.000Z

Manndrápshálka í morgun, allt malbik húðað með ísingu. Hefði ekki viljað reyna þetta án nagladekkja.
En ég hjólaði frá Hótel Sögu og heim í gær. Það er kominn nýr stígur austan Nauthólsvíkur, tvöfaldur hjólastígur. Þannig að það safnast í sarpinn. Tengingin yfir Hafnarfjarðarveg/Kringlumýrarbraut og inn í Fossvogsdal finnst mér alltaf klúðursleg. Ef maður kemur vestan frá, af fínum hjólastíg, þá er örmjó gangstétt meðfram götunni og ekki nóg með það heldur eru ljósastaurar á miðri gangstéttinni (hér er mynd af þessu horft í vestur). Aukinheldur er brekka upp og síðan strax aftur niður. Þarna þarf að breyta legu stígsins svo hæðarbreytingin sé tekin af. En þar er væntanlega við lóðareigendur að eiga.

16. nóvember

2010-11-16T08:38:00.000Z

Rigning og rok í morgun, megnið af klakanum farið. Ég var alltof mikið klæddur og varð kófsveittur. Það var frekar létt að hjóla með vindinn að hluta í bakið. Verður erfiðara heim.
Ég hef velt því fyrir mér hvort þeir sem almennt ráða hvort peningar eru settir í hjólabrautir haldi að hjólastígar á höfuðborgarsvæðinu séu bara fínir. Held reyndar að þetta sé raunin.

15. nóvember

2010-11-15T08:41:00.000Z

Kalt var í efri byggðum í morgun. En hlýnaði eftir því sem neðar dró. Myrkrið er svart og á köflum er eins og maður sé með bundið fyrir augun. Ekki síst þegar maður fer af stíg sem er vel upplýstur yfir á kafla sem er illa lýstur.

12. nóvember

2010-11-12T08:46:00.000Z

Ansi harður mótvindur á kafla í morgun, sérstaklega í trektinni úr Seljahverfi niður í Mjódd. Þar myndast vindtrekt af byggðinni sem safnar öllum vindi saman í annað hvort sunnan eða norðanátt. Annar staður þar sem byggingar gera manni erfitt fyrir er í Sóltúninu. Þar eru háar byggingar og miklar vindhviður á milli þeirra, erfitt að lesa í hvaðan vindurinn muni næst koma. Þetta á að vera heilmikil pæling við skipulag en hefur held ég gleymst illilega sumsstaðar hér á landi. Þetta er t.d. einn ókostur við Höfðatún þar sem er ægilega vindasamt.
Þetta leiðir allt að því sem ég var að hugsa í morgun að það þarf almennt að hafa trjágróður með hjólastígum á Íslandi ef vel á að vera. Tré mynda ekki samskonar trekt og byggingar og slá alltaf á vindinn, sama úr hvaða átt hann blæs. Þetta getur stangast á við markmið útsýnis en sé um að ræða samgöngubraut þá skiptir útsýni ekki máli nema vegsýn. Þarna kom semsagt innleggið frá mér í dag, trjágróður meðfram hjólastígum.
Við þetta er að bæta að vindurinn er sennilega ein ríkasta ástæðan fyrir því að fólk hjólar ekki á Íslandi. Hér er nánast alltaf vindur og hann er mjög fín afsökun fyrir að hjóla ekki. Enda getur hann verið ansi hvimleiður þegar hann er upp á sitt besta.

11. nóvember

2010-11-11T08:33:00.000Z

Nóvembermorgnarnir eru svartir. Götulýsing er því mjög æskileg með stígunum, svo maður sjái helstu fyrirstöður, sem þar geta verið. Mér sýnist hins vegar að Orkuveitan sé að spara hér eins og víðar. A.m.k. hefur verið slökkt ansi lengi á tveimur ljósastaurum í Elliðaárdal. Mig grunar reyndar að lýsingargleðin hafi verið mikil á tímabili og kannski óþarflega stutt milli staura en það afsakar ekki að hafa sprungna peru í staurum á vondum stað mánuðum saman.

10. nóvember

2010-11-10T08:42:00.001Z

Ætli það sé almennt þannig að nóvember líði mjög hratt. Það er strax kominn 10. nóvember og hann er nýbyrjaður. Í fyrra leið hann líka mjög hratt en þá var ég í fæðingarorlofi.
Ég ræddi við mann í gær sem sagði að hjólreiðamenn væru svolítið bilaðir. Ástæðan var að þeir voru margir ljóslausir og sæjust mjög illa í umferðinni. Og ætluðust síðan til þess að tekið væri tillit til þeirra. Það er nefnilega ekki hægt ef þeir sjást ekki. Því miður er talsvert til í þessu og oft mætir maður hjólreiðamönnum með lítið eða ekkert ljós. Þetta er síður en svo gáfulegt. Við ræddum líka hvort tryggingafélög gætu haft áhuga á að splæsa vestum á hjólreiðamenn. Ég efast um að þau hafi sérstakan áhuga á því enda yrði um talsverð fjárútlát að ræða af þeirra hálfu. En samfélagslegur kostnaður af slösuðum hjólreiðamanni er gríðarlegur, því það er mikil hætta á að hann slasist illa ef keyrt er á hann. Gul endurskinsvesti eru stórfínn fylgihlutur reiðhjóls. Persónulega get ég mælt með Craft vestunum sem eru mjög þunn og létt. Þau má nota allan ársins hring. Vestin í Erninum kosta um 2000 kall en þau eru held ég þykkari. Craft vestin eru til í Markinu og kosta talsvert meira.

9. nóvember

2010-11-09T08:47:00.000Z

Fór yfir 3000 km markið á árinu í gær á þessum hraðamæli. Þá er allt meðtalið, líka utan vinnuferða. Ef maður vill þá getur maður reiknað það yfir í bensín eða olíu. Þetta eru um 300 lítrar miðað við minn bíl. Þeir kosta í dag um 60 þús kall. Svo hef ég sleppt því að kaupa kort í ræktinni. Það kostar víst eitthvað líka. En á móti hefur komið smáræðis viðhald. Það eru reyndar nokkrir þúsundkallar á þessu ári, skipti um keðju og afturkrans, tvisvar um bremsupúða, framskipti og eitt og annað smáræði.

8. nóvember

2010-11-08T08:46:00.000Z

Það var orðið að mestu autt í morgun en þó svell hér og þar á leiðinni. Mitt fyrsta verk var að stoppa á N1 og bæta lofti í dekkin. Það var átakanlega erfitt að hjóla enda notaði ég litlu pumpuna til að dæla í nagladekkin. Mikið viðnám þegar of lítið er í dekkjunum. Nú er þetta allt annað líf. En ég klæddi mig heldur mikið, var þungur og sveittur en komst þó á leiðarenda.

5. nóvember

2010-11-05T08:51:00.000Z

Fallegt veður í morgun, logn og frost, sem er oft dálítið kalt á nefið. Seinnipartinn í gær var búið að skafa flesta stíga, misvel þó. Ég verð að hrósa þeim sem skóf stíginn með Stekkjarbakka og í Elliðaárdal, þar hefur hann eða hún náð að mynda slétt yfirborð sem mjög auðvelt er að hjóla. Það er því miður ekki hægt að segja um aðra stíga þar sem skilið er eftir hart og óslétt lag á stígnum. Það er sem sagt ekki nóg að skafa heldur þarf að gera það vel.

4. nóvember

2010-11-04T09:22:00.000Z

Fyrsti snjórinn þetta haustið. Bara frekar þungt færi en ekki óbærilegt. Ekki búið að moka neitt á leiðinni þannig að bæjarfélögin Reykjavík og Kópavogur fá ekki prik í dag. Hins vegar kom mér á óvart hversu mikil hjólaumferð hefur verið í morgun. Á undan mér hafa farið á milli 30 og 40 hjól og vafalítið áttu nokkrir eftir að fara. Þetta á við um leiðina frá Sprengisandi, yfir Miklubraut og meðfram Suðurlandsbraut. Auðvelt að telja förin í snjónum. Það má hugsa þetta svona: Fólk hyggst hjóla í vetur í fyrsta skipti. Ok, einu sinni snjór er ekki svo slæmt, gef þessu séns. En svo er ekkert mokað og færið er afleitt. Æi, ég hætti þessu bara, tek frekar bílinn.
Þetta er nú held ég mjög oft aðferð mannsins við að taka ákvarðanir. Ábyrgð bæjarfélaganna er því mikil, sé ætlun þeirra að stuðla að meiri hjólreiðum eða minni bílaumferð.

3. nóvember

2010-11-03T08:33:00.000Z

Ansi kalt í morgun. Áfram norðan mótvindur og frost. Þá er best að vera vindheldur og gott að setja buff utanyfir lambhúshettuna á viðkvæmum stöðum. Við þessar aðstæður set ég buffið yfir eyru og vit. Það er pínulítið gat á öðrum vettlingnum og það er mjög áberandi kaldasti staðurinn á hendinni eftir hjólatúrinn. Vindþéttar buxur eru ráðlegar þegar er svona kalt. Annars verða liðamót stirð og nárinn ískaldur. Sem sagt klæða sig eftir aðstæðum.

2. nóvember

2010-11-02T08:56:00.000Z

Skipti yfir á nagladekk að framan í morgun og talsverð hálka víða á leiðinni. Framdekkið gerir góða hluti eitt og sér, það reynir ekki nærri eins mikið á afturdekkið fyrr en þarf að spyrna sér upp brekkur eða í vondu færi eins og slabbi eða snjó. En afturdekkið fer sennilega undir í kvöld.
Annars var skítakuldi í morgun með norðanátt. Samt ofan við frostmark. Þó suðaustanáttin sé stundum leiðinleg þá er hvöss norðanátt verri því henni fylgir svo mikill kuldi.

1. nóvember

2010-11-01T08:40:00.000Z

Dagurinn byrjaði með slabbi í efri byggðum sem svo breyttist í bleytu neðar. Það slapp sumsé við alvarlega hálku enda fórst fyrir að skipta yfir á naglana. Það kom ekki að sök. Nóvember leggst hins vegar oft betur í mig en október, held það sé bara nafnið sem er einhvern veginn jákvæðara í mínum huga. Svo er reyndar mikið um afmæli í fjölskyldunni í nóvember, það kannski gerir mánuðinn skemmtilegri.

29. október

2010-10-29T08:56:00.002Z

Í dag er síðasti dagurinn sem ég hjóla til vinnu í október. Þetta er fallegur dagur og veður gott.
Ég man ekki alveg hvað ég var að hugsa á leiðinni en það er nú frekar algengt. Hins vegar brýt ég stundum um það heilann hvort ég sé í raun annars hugar þegar ég hjóla vegna eigin vangaveltna. Því oft kemur eitthvað upp í hugann þegar hjólað er, ekki síst ef maður hjólar oft sömu leið. En það er held ég ekki svo því ég spái mikið í smáatriði á leiðinni, hvort þessi pollur er frosinn þennan morguninn, hvort kanínurnar eru nú vaknaðar og hvort ég nái nú þessum ljósum eða ekki.
Talandi um vindhraða þá er athyglisvert að skoða vindhraðagögn fyrir árið hingað til sem sést á myndinni að neðan. Almenna trendið er að vindurinn er að meðaltali mestur í janúar og lægir fram á vorið. Í ár var meðalvindhraði minnstur í ágúst. Október kemur síðan betur út en september og þá er vindur seinnipartinn svipaðar og á morgnana. Mín tilfinning síðasta vetur var að það væri sífellt mótvindur á leiðinni heim. Málið er kannski að þá var líka meiri vindur.

Ef við skoðum mun á meðalhraða eftir því hvort mótvindur er eða ekki þá munar nokkru á hraðanum eftir því hvort mótvindur er eða ekki en hann er ótrúlega lítill eins og sést á myndinni að neðan (y ásinn er hraði í km/klst). Í ágúst var vindur mjög lítill og því meira komið undir dagsformi en öðru hver hraðinn er. Munurinn er mestur í febrúar og apríl.

28. október

2010-10-28T08:42:00.001Z

Ég var enn og aftur að hugsa um hvernig mismunandi ferðamátar fléttast saman á leiðinni í morgun. Á einföldum gangstígum er gangandi fólk og hjólandi. Fólk með hunda í bandi, börn, framhaldsskólanemar í hóp, hjólanördar að flýta sér og allt þar á milli. Á stígum þar sem hjólrein er aðgreind frá gangandi umferð er allur gangur á því hvort fólk heldur sig réttu megin, það á við um hjólandi, gangandi og hlaupandi. Hjólreiðamenn fara að öllu jöfnu hraðar en gangandi og því er mikið um framúrakstur. Vegna þess að hjólin eru nánast hljóðlaus þá er alls óvíst að þeir sem hjólað er fram úr séu meðvitaðir um tilvist þess sem fer fram úr.
Á götunni er bíllinn mjög ráðandi en nokkrir hjóla mikið á götum. Það er hins vegar allur gangur á hvernig þessi blöndun gengur. Margir bílstjórar sýna mikla tillitssemi en sumir missa þolinmæðina og reyna framúrakstur á slæmum stöðum, flauta eða hreyta hrakyrðum í hjólandi vegfarendur. Þeir sem hjóla eru sumir mjög illa búnir m.t.t. sýnileika, hvorki með endurskinsmerki eða ljós.
Ég hef stundum litið svo á að með því að vera mikið á ferðinni á hjóli og með því að haga mér þokkalega, vera vel sýnilegur, nota bjöllu, halda mig á hjólarein þar sem hún er en annars hægra megin þá stuðli maður að betri blöndun mismunandi ferðamáta. T.d. held ég að á hverjum degi veki ég einhvern til umhugsunar um að það séu aðrir ferðamátar. Það tekur t.d. tíma að átta sig á því hvernig ljós á reiðhjóli sjást í rökkri. Þau eru yfirleitt bjartari en bílljós, hreyfast hægt (m.v. bílljós) en það er hægt að rugla þeim saman við götulýsingu. Sama gildir um afturljós á reiðhjóli. Þegar ég þvera götu þá lærir kannski einhver bílstjórinn að stoppa bílinn ekki á þveruninni, heldur aftan við hana o.s.frv.
Blöndunin er held ég af hinu góða en hún krefst þess að allir vegfarendur séu þokkalega með á nótunum, fylgi þeim reglum sem eru í gildi og hagi sér eins og siðað fólk. Alger aðgreining ferðamáta er hins vegar hin einfalda lausn.

Sá þessa fallegu umfjöllun um hjólreiðamenn áðan í tengslum við óvísindalega könnun á notkun á hjólareinum í New York:
"There's a tendency to talk about people who ride bikes as though they're a lawless bunch of yahoos. This study is a breath of fresh air in showing that no, they are simply, like all other people, responding to an environment that doesn't always serve their needs. When you're driving, the extra space a bike lane offers is a matter of mobility and convenience; if you're riding a bike, it's a matter of being seen and staying alive.
People run red lights on bikes not out of wanton disrespect for the world's moral order, but because when you're riding in a sea of cars occupied by people who probably don't notice or care about your existence, you're much safer getting as far ahead as possible."

27. október

2010-10-27T08:38:00.000Z

Fyrsta hálkan í morgun og hún var allsstaðar. Ég er enn á sumardekkjum og þræddi gangstéttar og stíga þar sem er meiri stemma. Mér leist reyndar ekki á blikuna, nýlagður af stað þegar afturbremsan datt úr sambandi. Ég hélt hún væri slitin en hún hafði bara losnað svo málið leystist auðveldlega. En virðist vera einhver sólbráð í kortunum svo ég reyni að geyma dekkjaskipti fram á helgina ef ég get. Það er svo leiðinlegt að hjóla mikið á auðu á nöglum.

26. október

2010-10-26T09:07:00.000Z

Heimleiðin í gær var svosem ekki mjög slæm. Ég valdi leiðir þar sem trjágróður er í næsta umhverfi og þræddi stíga þar sem sló aðeins í vindinn. Þetta var heldur ekki nema 11 m/s. Það er bara nánast regla að veðrið er betra þegar í það er komið en maður heldur.
Ég var frekar seinn fyrir í morgun og það var lítil umferð hjólandi fólks. Veður var hins vegar milt og rakt og bara notalegt til að hjóla.

25. október

2010-10-25T09:47:00.000Z

Það spáir hvössu í dag en morguninn var ekki mjög slæmur enda að stórum hluta meðvindur. Gæti orðið erfiðara á heimleiðinni. Kanínurnar hafa safnast saman og það var nánast örtröð yfir stíginn svo ég þurfti að hægja á.
Annars velti ég fyrir mér á leiðinni hvort kemur á undan, að margir hjóli dags daglega, sem leiði til góðrar þjónustu við hjólreiðamenn eða hvort góð þjónusta við hjólreiðamenn leiði til þess að margir hjóli?
Ég var bara að velta þessu fyrir mér því það er vafalítið snjór á næsta leiti og miðað við þjónustuna síðustu ár þá hafa hjólreiðastígar mætt afgangi í snjómokstri. Það er nefnilega svo einfalt að ef stígarnir eru ruddir nógu snemma á morgnana þá er mjög lítið mál að hjóla.

21. október

2010-10-21T08:44:00.000Z

Það var ansi svalt í morgun. Ég keypti mér vettlinga í gær í Everest. Spurðist fyrir um góða vettlinga á hjólið í kuldanum. Ekki spurning hvaða vettlinga ætti að nota að mati afgreiðslufólks og það sem betra var, þeir voru ekki fáránlega dýrir. Þeir stóðu hins vegar engan veginn undir væntingum í morgun og mér var ískalt á puttunum. Hvað gerir maður þá? Ég get sjálfum mér um kennt en góðir hjólavettlingar kosta orðið 9 þús kall. Ætti ég að kvarta við Everest. Sennilega. En ólíklegt að ég beri nokkuð úr býtum.
Annars lenti ég nánast í árekstri við annan hjólreiðamann í gær. Á mjög dæmigerðum stað í beygju við undirgöng við Sprengisand. Mér tókst að beygja framhjá honum en hann datt í götuna og var aumur í úlnlið á eftir. Hér má sjá hvernig aðstæður eru við svona undirgöng, þessi göng eru við hliðina: http://picasaweb.google.com/barkarson/Hjoladagbok#5382174533393454098 Yfirleitt eru stígarnir hannaðir þannig að það er vinkilbeygja inn í undirgöngin og því undantekningalítið um blindbeygjur að ræða. Þó maður sé á lítilli ferð þá er alltaf hætta á að annar hvor sé of innarlega í beygjunni. Þetta mætti leysa með leiðbeinandi merkingum eða aðvörunum.
Ég setti aukaljós aftaná hjá mér svo ég sjáist betur á götunni. Margir hjólreiðamenn eru með lítið ljós sem festist niður við afturöxulinn. Þau eru mjög léleg og sjást illa. Staðsetja þarf ljósin ofar, nálægt hnakknum.

20. október

2010-10-20T10:00:00.000Z

Veðrið kom mér í opna skjöldu í morgun. Blíðviðri og yfir frostmarki.
Ég sá í fréttum í gær að Reykjavíkurborg hefur áhuga á samfelldum stíg meðfram ströndinni. Tvö atriði varðandi það: Í fyrsta lagi þá er stígur víða meðfram ströndinni, reyndar ekki sérstakur hjólastígur nema á smá kafla. Tengingar á milli kafla eru hins vegar ömurlegar eins og frá Ægissíðu vestur á Seltjarnarnes og frá Granda vestur á Sæbraut. Svo má líka nefna Sæbraut austan Laugarness.
Einnig gæti þetta verið mjög góð byrjun á samstarfi sveitarfélaga varðandi þennan samgöngumáta.
Hins vegar finnst mér eiginlega liggja meira á almennilegum stofnbrautum hjólreiða á helstu samgönguleiðum og þá þvert á sveitarfélagamörk.

19. október

2010-10-19T08:35:00.000Z

Fyrsti frostmorguninn en engin hálka nema nokkrir pollar sem höfðu breyst í fast form. Það er vel bærilegt að hjóla í 20 mínútur í smá frosti ef maður kemst svo í sturtu og fær kaffibolla í kjölfarið. Hins vegar vill vera í manni hrollur fram eftir degi. Maður verður hins vegar mjög meðvitaður um veðrið með tímanum og tekur veðurfréttir, gáir til veðurs á morgnana og reynir að klæða sig að einhverju leyti samkvæmt því. Of mikið af fötum er hins vegar álíka slæmt og of lítið.

18. október

2010-10-18T08:43:00.000Z

Október er búinn að vera mjög óstabíll hjá mér hingað til. Nú er haustið komið í alvöru, snjór í Esjunni og kanínurnar híma. Það má reikna með hálku næstu morgna en kannski ekki nema á lægstu punktum. Umhverfið er allt frekar blautt svo skilyrði fyrir hálkumyndun eru mjög góð. Helst vill maður þó geyma að setja nagladekk undir fyrr en um miðjan nóvember.

12. október

2010-10-12T08:29:00.000Z

Jæja loksins kominn aftur á hjól. Nánast viku hlé vegna veikinda, helgar og foreldraviðtala. Enda var skrokkurinn vel út hvíldur en aðeins ryðgaður í gang í morgun. Það verður sífellt skuggsýnna á morgnana og dóttir mín benti mér á að hún þyrfti ljós eins og ég er með. Hún hjólar flesta daga í skólann. Ég er mjög sáttur við það.
Kannski, og bara kannski, hefur maður einhver áhrif á börnin með því að vera duglegur að hjóla. Þau sjá að þetta er ein leið til að ferðast milli staða og kannski bara ágætur ferðamáti. Það eru ein góð rök með því að hjóla mikið.

5. október

2010-10-05T09:08:00.000Z

Ég get því miður ekki stært mig af því að hafa mótmælt við Alþingishúsið í gær. Ærin ástæða til.

Hjólaði þess í stað heim í gær.
Morguninn var síðan barátta við mótvind. Hvassa norðanátt, sem þó var ekki mjög köld. Eiginlega ótrúlega hlý miðað við árstíma.

1. október

2010-10-01T09:00:00.000Z

Allt í einu kominn október og strax dimmara á morgnana. Það var einhver þreyta í lærunum á mér í morgun svo ég tók því rólega á leiðinni niðureftir. Það var líka mótvindur hluta af leiðinni.

30. september

2010-09-30T08:42:00.000Z

Svona til að skrásetja það þá spáði nú ekki vel seinnipartinn í gær en það var ekki svo slæmt, þrátt fyrir 8 m/s mótvind. Var reyndar aðeins að flýta mér og það hefur áhrif. Ég virðist sumsé komast hraðar ef ég flýti mér þó ég hjóli sennilega frekar hratt almennt.
En það var líka nokkur meðvindur í morgun, þó ekki nema 6 m/s. Og fleiri á ferðinni á hjóli en í gær.
Það er mikið af pollum og því verður maður rækilega blautur í lappirnar ef skórnir eru ekki vatnsheldir. Þá er gott að vera í góðum sokkum. Ég fann nefnilega Icebreaker sokkana mína og verð því í góðum málum næstu mánuðina.

29. september

2010-09-29T08:56:00.000Z

Rok og rigning. Þessi blanda er mjög reykvísk. Temprað veðurfar gerir það síðan að verkum að það er sjaldnast kalt í roki og rigningu. Þess vegna getur þetta veður bara verið mjög skemmtilegt til útiveru. Helsti gallinn við að hjóla í svona veðri er annars vegar að hjóla á móti vindi, sem getur tekið svolítið á, og hins vegar að fá á sig hliðarvind sem getur feykt hjólreiðamanni um koll. Man eftir einu slíku veðri í fyrra. Í morgun snerist þetta svolítið um að fjúka ekki fyrir bíla. Bæði þarf meira til að stoppa þegar vindurinn feykir manni áfram og bílstjórar sjá mann síður vegna lakara skyggnis. En það var lítil hjólaumferð þegar ég var á ferðinni í morgun, mætti einum jaxli sem ég mæti nánast á hverjum morgni. Hann var í mótvindi.

28. september

2010-09-28T10:24:00.000Z

Ég var nærri því að taka kanínu af lífi í morgun, eða hún mig. Skaust örsnöggt út úr gróðrinum og yfir stíginn. Ég var á um 40 km/klst hraða. Hef stundum velt því fyrir mér hvernig hjólið hagar sér þegar það fer yfir kanínu, hvort það hoppar eins og um stein væri að ræða eða bara kremur kanínuna. Þetta væri gott að vita svo maður sé viðbúinn.
Annars var frekar hvasst í morgun og stefnir í enn hvassara seinnipartinn. Það er bara hressandi.

27. september

2010-09-27T08:35:00.000Z

Haustrigningarnar komnar með bleytuna og rokið með. Tími til kominn að hreinsa laufin af trjánum. Þá setjast þau á stígana og mynda þar sleipa þekju. Gæti verið vont í beygjum þar sem hjólin geta skriðið til hliðar í sullinu. Þetta er eitt minniháttar öryggisatriði.

23. september

2010-09-23T16:04:00.000Z

Var næstum búinn að gleyma þessu í dag. Ekki þannig að það sé mikið að frétta. Nema systir mín á afmæli í dag og hefur ábyggilega hjólað í vinnuna.
Rak augun í stutta umfjöllun Láru Ómarsdóttur í kvöldfréttunum í gær um hina ýmsu bastarða í vegmerkingum hjólreiðamönnum til handa. Skemmst er frá því að segja að þeir fylgja oft engum reglum og gefa engan forgang. Hjólavísar eru meira sálfræðilegs eðlis en eitthvað annað. "Hjólabrautir" byrja og enda að því er virðist án samhengis við nokkuð.

22. september

2010-09-22T08:25:00.000Z

Hæð yfir landinu og í fyrsta skipti síðan mínar skráningar hófust segir Veðurstofan logn. Enda frábær haustmorgun, bjartur og kaldur. Ég ákvað að setja upp lambúshettuna og fara í windstopperinn og vettlinga. Finn samt hvergi Icestorm sokkana mína sem ég notaði í allan fyrravetur. Þannig að ég er bara í einhverjum lélegum bómullarsokkum. Þarf að bæta þar úr.

21. september

2010-09-21T08:44:00.000Z

Það var ótrúlega mikil hjólaumferð í morgun. Og það er greinilegt að þessi hjólatraffík hefur góð áhrif á bílstjóra. Þeir taka marktækt meira tillit til manns eftir því sem fleiri eru hjólandi í kringum þá. Þetta getur nefnilega farið ágætlega saman. A.m.k. í mörgum hverfum. Ekkert við það að athuga að aðskilja hjól og bíla á hröðum stofnleiðum en almennt á þetta að ganga vel þar sem er 50 km hámarkshraði.

20. september

2010-09-20T08:32:00.001Z

Kaldasti morguninn hingað til. Samt um 4 stiga hiti skv Veðurstofunni. Það er þó eitthvað mismunandi eftir aðstæðum.T.d. örugglega lægri hiti í Elliðaárdal, þar sem frostið á heima.
Nú er fólkið með hetturnar komið á kreik og tínir sveppi í gríð og erg í Elliðaárdalnum. Vonandi kemst það í góða vímu af þessu. En þetta er árlegur viðburður á þessum árstíma að hjóla frammá fólk í hettupeysu, sem rýnir ofaní grassvörðinn.

17. september

2010-09-17T08:31:00.000Z

Á þessum tíma verður maður að endurskoða hjólaklæðnaðinn. Eitt til tvö buff eða lambhúshetta fer að verða nauðsynleg, a.m.k. á morgnana. Vettlingar, helst vindheldir og mjúkir. Svo er gott að vera í ullarbol næst sér og einhverju léttu og vindheldu utanyfir. Svo eru s.k. windstopper jakkar ágætir að hjóla í en þá má ekki vera í þykku innanundir þeim. Buxurnar eru svo kapítuli út af fyrir sig. Ég keypti mér fljótlega hjólabuxur, bæði stuttar og síðar. Þegar haustar er ég í hvorutveggja. Þegar síðan kólnar meira þá er nóg að fara í vindheldar buxur utanyfir og þá er maður seif.
Val á skóm eru ekki mikil vísindi en það eru kannski frekar sokkarnir sem þarf að huga að. Það er hins vegar erfitt að komast hjá því að vera kalt á tánum þegar hiti er kominn niður undir frostmark.

Bara svo það sé bókað þá skipti ég um keðju og afturkrans á hjólinu. Það má áætla að það sé eftir vel rúmlega hjólaða 5000 km. Ég hef ekki hugmynd um hvað er eðlileg ending í þessu. En svona varahlutir kosta um 12 þús.

16. september

2010-09-16T09:19:00.000Z

Það slitnaði keðjan á hjólinu mínu en ég fékk lánað hjól í vinnunni. Fjallahjól með breiðum dekkjum og dempara að framan sem ekki er hægt að læsa. Það var talsvert þyngra að hjóla á því en mínu hjóli. En ágætis átök.
Það er talsvert um glerbrot á stígunum og að sópa stígana er ekki eitthvað sem gert er mjög reglulega nema að vori til þegar sandinum er sópað burt eftir veturinn. Úr þessu mætti vel bæta.

14. september

2010-09-14T12:36:00.000Z

Nú er komið enn meira haust í þetta. Kemur þessi fína norðanátt seinnipartinn. En það er hluti af tilverunni.

10. september

2010-09-10T08:56:00.000Z

Ég braut afturskiptinn á hjólinu á heimleið í gær. Teymdi það í Markið og skildi eftir. Tók strætó í gær og í morgun.
En nú er það hjólakortið. Ég er að pæla í að flokka hjólaleiðir eða kafla eftir "gæðum". Gæðinn eru afstæð því það er misjafnt hvað hentar hverjum og einum. En þrír einfaldir flokkar segja þónokkra sögu. Grænar leiðir eru greiðir stígar, tiltölulega öruggir. Bláar leiðir eru ekki eins greiðir stígar, t.d. fleiri þveranir, blindbeygjur og slíkt, eitthvað af götum og eitthvað af gangstéttum (sem eru oft stórhættulegar), ekki eins öruggt. Rauðar leiðir eru svo þar sem engar hjólaleiðir eru skilgreindar, bara gangstétt og/eða gata, óöruggt.
Ég er kominn með nokkrar leiðir þarna inn og setti líka ljósmyndir sem ég hef tekið. Þetta er hægt að skoða hér.

9. september

2010-09-09T08:40:00.001Z

Þrátt fyrir að veðrið sé mjög gott, milt og þægilegt þá sýnist mér að haustvindarnir séu að grípa inn í annars vindlítið sumar. Þetta má sjá á meðfylgjandi mynd sem sýnir meðalvindhraða á mínum ferðum það sem af er árinu. Reyndar eru ekki margir dagar á bakvið tölfræðina fyrir september. En ég held þetta gefi almennt vísbendingar um þróunina fyrir árið. Það er líka athyglisvert að hér er yfirleitt meiri vindur seinnipart dags, nema reyndar í júlí. Vindurinn er sennilega sá umhverfisþáttur sem hefur hvað mest áhrif á hjólandi fólk og því gott að þekkja til helstu einkenna vindsins á sínum heimaslóðum. T.d. eru ríkjandi vindáttir mikilvæg stærð í hönnun hjólaleiða og hugsanlega hönnun skjóls í tengslum við það. Þar kemur trjágróður sterkur inn.

8. september

2010-09-08T08:30:00.000Z

Í gær hjólaði ég leiðina meðfram Reykjanesbraut í Smiðjuhverfinu í Kópavogi. Þar er nýr stígur sem tengist undirgöngum undir Breiðholtsbraut (sjá hér).
Þetta er ágætt skref en það vantar að gera þverun Smiðjuvegar aðgengilega. Þar eru mjög háir kantsteinar og talsverð umferð. Úr því þarf að bæta.
Haustið byrjar hins vegar mjög vel hvað veður snertir, hlýtt og lítill vindur.

7. september

2010-09-07T09:06:00.001Z

Ljósin komin á og haustvindurinn blæs. Það er sjálfsagt að setja upp öll öryggistæki núna, nema nagladekkin. Þau koma seinna.
Það kom fram í Fréttablaðinu í morgun að sala á allskyns dóti til hjólreiða, sérstaklega fylgihlutum ýmisskonar, hafi aukist um 30-40% á síðustu árum. Þetta eru t.d. töskur og bögglaberar. Fólk notar svoleiðis annaðhvort til hjólaferða eða samgönguhjólreiða.
Ég var að rýna hjólaleiðir milli Reykjavíkur og Hafnarfjarðar í gær. Það vantar sárlega góðar tengingar á milli sveitarfélaganna, einkum með það fyrir augum að mynda góðar stofnbrautir. Það er ein slík samsíða Hafnarfjarðarvegi, sem þó mætti bæta talsvert á köflum. Það vantar hins vegar góða tengingu meðfram Reykjanesbrautinni, sem þræðir meðfram hæðunum í Kópavogi og Garðabæ en ekki uppá þær. Litlar hæðarbreytingar eru einn af lykilþáttum góðra hjólaleiða. Reyndar benti vinnufélagi minn mér á að það væri stígur meðfram Reykjanesbraut til móts við Mjóddina, Kópavogsmegin. Það vantar samt að greiða leiðina yfir Smiðjuveg. Sömuleiðis lenti hann í vandræðum með að komast áfram í gegnum Garðabæ, suður í Hafnarfjörð.

31. ágúst

2010-08-31T09:30:00.001Z

Rigning og huggulegheit að hjóla.
Nú hef ég komist á þá eindregnu skoðun að það á almennt að gera ráð fyrir hjólreiðafólki á götum í þéttbýli. Sumar götur eru það hraðar að það gengur e.t.v. varla en ef sett er hjólarein með aðal stofnbrautum þá getur það vel gengið þó hámarkshraði sé yfir 50 km/klst. Það er einfaldlega stórhættulegt að hjóla á gangstéttum og oft á tíðum á gangstígum, nema þar sé afmörkuð braut fyrir reiðhjól. Gangstéttar eru einkum hættulegar þegar þvera þarf götur, oft blindhorn og engin leið að sjá bíla fyrir. Samgönguhjólreiðar verða að byggja á því að hægt sé að hjóla tiltölulega hratt á milli staða, 20-40 km hraði. Það gengur ekki á gangstéttum.

30. ágúst

2010-08-30T08:57:00.001Z

Fyrir rétt rúmu ári síðan eða 28. ágúst 2009, setti ég inn fyrstu bloggfærsluna hér varðandi hjólreiðar til og frá vinnu (sjá hér). Alls eru síðan 168 bloggfærslur, sem er eiginlega færra en ég bjóst við. Inn í þetta spila síðan öll frí og mánaðar fæðingarorlof.
Það er svolítið fyndið að lesa þessar fyrstu færslur. Ég er að finna að því að framhaldsskólanemar taka upp stígana og gróður hangir inn á stígana í Elliðaárdalnum. Þetta er einmitt eitthvað sem ég skrifaði um í síðustu viku. Og ég var reyndar með ónýta bremsupúða fyrir ári síðan. Skipti einmitt í síðustu viku. Það er reyndar annar gangurinn þannig að það má reikna með tveimur göngum af púðum yfir árið þegar maður hjólar um og yfir 3000 km á árinu.
Samkvæmt gamla blogginu er ég kominn með ljósin á í lok ágúst. Best að bæta úr því.

27. ágúst

2010-08-27T08:51:00.000Z

ÉG skil ekki hvað er verið að amast við þessum blessuðum kanínum í Elliðaárdalnum. Það er bara gaman að sjá eitthvert líf á leiðinni. Og þó að mávurinn hirði nokkra kanínuunga, það er bara lífið.
En það var gaman að horfa á eftir dætrum mínum í morgun á hjólum á leið í skólann. Þeim finnst sjálfsagt að hjóla meðan veður og færð er eins og það er.

26. ágúst

2010-08-26T09:21:00.000Z

Nú er kominn sá tími ársins sem hættulegustu einstaklingarnir eru komnir á kreik í umferðinni. Ungir bílstjórar, sem gjarnan eru að flýta sér í skólann. Það kemur best fram þegar maður þarf að þvera götur. Þá er hópur ungra bílstjóra sem hefur ekki snefil af tillitssemi við hjólandi fólk og ekur fyrir mann eins og ekkert sé sjálfsagðara. Smá pirringur hjá mínum í morgun sem er gott að fá útrás fyrir.
Eins er mikill fjöldi af framhaldsskólanemum á göngustígum á morgnana og seinnipartinn, oft margir saman og fylla alveg út í stíginn þannig að erfitt er að komast framhjá. Þá er bjallan nauðsynlegt tæki.
En nú er sumsé kominn tími á aðeins breytingu í fatavali fyrir hjólreiðaferðina. Loftið er kaldara og því þörf á fleiri lögum. Þunnur bolur og vindjakki yfir, jafnvel áberandi vesti. Ef einhver vindur er þá er betra að vera með buff undir hjálminum, svona yfir eyrun. Svo geta fingurgómarnir orðið kaldir ef maður er ekki með vettlinga. Það er t.d. lítið skjól í hjólagrifflunum mínum.

25. ágúst

2010-08-25T08:56:00.000Z

Ekta haustmorgunn, bjart og svalt. Nú koma haustlitir í lyng og lauf.

24. ágúst

2010-08-24T08:48:00.000Z

Kominn aftur í gang. Fullt af fólki á hjólum um kl. 8 í morgun og veðrið dásamlegt. Það er hins vegar komið haust í loftið, lykt af sölnuðu laufi, skuggarnir hafa lengst og skólakrakkar hvarvetna.
Í Elliðaárdalnum hangir allskyns villigróður inn á stígana, þistlar og eitthvert annað hávaxið illgresi með bleikum blómum.
Það surgaði í bremsunum að aftan og væntanlega kominn tími til að yfirfara hjólið fyrir haustið. Skipta um bremsuborða, fínstilla gírana og koma ljósum aftur á að framan og aftan.

23. ágúst

2010-08-23T14:00:00.000Z

Ég get því miður ekki bloggað um hjólaferðina í dag þar sem ég hjólaði ekki. Hins vegar langaði mig til að stimpla það inn að ég hef fengið staðfest að maður sem ég umgengst nokkuð í vinnu ætlar að leggja bílnum og viðurkenndi að hafa orðið fyrir áhrifum frá mér. Þetta er því mjög gleðilegur dagur. Hann fékk sér hins vegar racer og nú langar mig í svoleiðis.

13. ágúst

2010-08-13T08:29:00.000Z

Mikil rigning og hressandi að sama skapi. Í svona rigningu er væntanlega betra að hafa eitthvað mynstur í dekkjunum sem flytur vatnið svo hjólið fljóti ekki ofaná. Það þarf kannski meiri hraða til að hjólið fljóti upp, ég hef allavega ekki lent í þessu.

12. ágúst

2010-08-12T08:21:00.000Z

Ég er á því að umferðin sé að aukast eftir sumarleyfi. Maður þarf að gæta meira að sér nú. Reyndar setti rigningin líka strik í reikning, hjólandi maður sést verr. Nú er bara að taka vestið fram, haustið í nánd og skólarnir að byrja.

11. ágúst

2010-08-11T08:23:00.000Z

Skemmtilega mikil hjólaumferð í morgun. Allskyns hjól og allskyns fólk á ferðinni.
Þess ber að geta að í byrjun ágúst fór ég yfir 2000 km á árinu, til og frá vinnu. Þetta segir ekki mikla sögu en er þó eitthvað sem er að baki. Það má vel reikna sparnaðinn af þessu en það er líka óþarfi. Þetta er bara svona.

10. ágúst

2010-08-10T08:31:00.000Z

Það sígur á sumarið og fólki á stígunum er farið að fjölga á nýjan leik eftir afar rólegt sumar. Gróður hangir víða inn á stígana, einkum frá einkalóðum, slær mann í andlitið fyrirvaralítið.

6. ágúst

2010-08-06T08:41:00.000Z

Maður er greinilega aðeins stirður að byrja aftur að hjóla. Munar greinilega um tveggja vikna hlé. En það kemur strax aftur.
Hitti félaga minn í sundi um daginn sem sagðist vera með klemmupedala. Það væri allt annað líf og eina vitið fyrir þá sem hjóla daglega til og frá vinnu. Hann sagðist líka vera með mjög mjó dekk á hybrid hjólinu. Draumur einn. Dálítið dýrt samt að skipta yfir í klemmupedala. Skór lágmark tæp 20 þús.

5. ágúst

2010-08-05T13:25:00.000Z

Jæja, þá er sumarfríið að enda í bili og ég hjólaði létt í vinnuna seint og síðar meir í morgun. Það er eins og vant er lítill vindur og mesta blíða. Hef ekkert hjólað í tvær vikur en það kemur strax aftur. Nú styttist líka í að ég loki árshringnum í hjólablogginu og spurning hvað á að gera í haust.

19. júlí

2010-07-19T10:25:00.002Z

Heitasti dagurinn sem ég hjóla á þessu ári. Sól og örlítil gola. Búnir að vera nokkrir svona dagar í röð, alger snilld.

15. júlí

2010-07-15T08:31:00.000Z

Góður dagur í dag. Þetta er bara eins og í útlöndum. Sól á daginn og rigning á kvöldin.
Ég reikna með að fara í sumarfrí eftir daginn í dag og þá verður kannski eitthvað hjólað í frístundum.